Grappies

DIE SKILPAD
   Ek en Poppie kom nou-die-aand van die kerk af. Ons was amper by die huis toe iets in die straat my aandag trek. Ek was aanvanklik onseker oor wat dit was. My eerste indruk was dat daar ‘n skilpad in die middel van die straat gestaan het. Ek kon duidelik die blink dop met die twee klein ogies sien.
   Toe ek rem aanslaan, trek Poppie haar asem skerp in en roep: “Daar’s ‘n skilpad!” Al het ek aanvanklik getwyfel oor wat my oë sien, het ek nou verseker geweet – dit is ‘n skilpad. Reg in die middel van die straat! Die laaste keer wat ek ‘n skilpad in die pad gesien het, was tussen Colesberg en Steynsburg toe petrol nog drie rand ‘n liter was. En hier, so wragtag, in ons eie straat staan weer een. En wat ‘n pragtige voorbeeld van die spesies was dit nie! Met die besondere blink dop, veral so in die kar se ligte. En die klein blink ogies, so na aan mekaar.
   “Ag siestog,” sê Poppie, “gaan tel hom op.”
   Ek was maar bietjie skrikkerig. Dit kon dalk ‘n lokval wees. Ek het al gehoor dat haaijekkers baie kreatief is om jou uit jou kar uit te kry. Maar ‘n man is ‘n man en met die kar se ligte vol op die onskadelike diertjie klim ek uit en nader ek hom versigtig.
   Ek was seker so ‘n tree of twee van hom af toe lig hy sy koppie so en ek hoor duidelik hoe sê hy vir my “Naand oom.” Jy kon my met ‘n pienk veertjie omslaan. ‘n Skilpad wat praat!
   Ek weet dit mag vreemd klink, maar voor ek my kon keer toe sê ek: “Goeienaand.” Dit was alles so onwerklik. En iets aan sy stemmetjie het so bekend geklink. “Wat is jou naam?” vra ek.
   “Oom dis ek, Willie. Oom se buurman se seun. Ek het met my motorfiets in hierdie slaggat geval. As dit nie vir my helmet was nie, het ek sweerlik my nek gebreek.”

MAKLIK GEDOEN
Die man vra vir die kelner in die restaurant of hulle wilde eend het.
Kelner: "Nee, meneer, maar ons kan 'n makke vir meneer die moer in maak!"

'N MENS SUKKEL NIE MET OUMENSE NIE
Om te sien hoe 'n ou tannie 'n jappie in sy Mercedes reggesien het, klik hier

TERTE
Op die kerkbasaar van 'n klein dorpie vra 'n koerantfotograaf die predikant : "Dominee, waar is die terte?"
Heeltemal uit die veld geslaan, hakkel die dominee en sê: "Nee, broer, hier is 'n paar jong onderwyseressies, maar hulle is ongelukkig almal op vakansie."

PETOORSIE SE WISKUNDE
Klein Petoorsie kom van die skool af en sê hy het 'n F vir wiskunde.
"Hoe de hel kry jy dit reg?" vra sy pa boos.
"Wel, die juffrou het gevra wat is 2x3, en toe sê ek dis 6."
"Maar dis korrek!" sê sy pa.
"Ja, maar toe vra sy my wat is 3x2."
"So," sê sy pa, "wat is die donnerse verskil?"
"Ja, pa, dis wat ek ook gesê het!"

SPOED
Die verkeerskonstabel sit agter 'n boom op die hoofweg en wag vir iemand om die spoedbeperking te oortree.
Hy sien hier kom 'n kar aangekruie met 'n spoed van 22 km/ph. Hy dink dis nou nie oor die spoedgrens, maar kan net so gevaarlik wees.
Hy stop die kar en sien vyf senior dames in die kar met sulke groot oë en bleek gesigte. Die drywer maak haar venster oop en sê "Konstabel ek het nie oor die spoedgrens gery nie."
Die konstabel antwoord "Ek weet tannie maar u ry heeltemal te stadig en is nie eers op die minimum spoedgrens nie."
"Maar konstabel, ek het die presiese spoedgrens gery van 22 km/ph." sê die tante.
Die konstabel kyk so en sê "Tannie die bordjie wat u gesien het was die hoofweg se naam die R22."
Die tante word toe rooi in die gesig van verleentheid en sê: "Jammer konstabel ek sal in die toekoms seker maak ek kyk na die regte padtekens"
Hy kyk so na die ander en vra "Is die ander tantes darem nog reg? Hulle oë is so groot soos pierings en hulle is almal so wit soos spoke."
Die Tante antwoord: "Ag toemaar hulle sal regkom so oor 'n minuut of wat. Ons kom nou net van R365 af."